"לַמְנַצֵּחַ מִזְמוֹר לְדָוִד.

יַעַנְךָ ה' בְּיוֹם צָרָה

יְשַׂגֶּבְךָ שֵׁם אֱלֹהֵי יַעֲקֹב.

יִשְׁלַח-עֶזְרְךָ מִקֹּדֶשׁ

וּמִצִּיּוֹן יִסְעָדֶךָּ.

יִזְכֹּר כָּל-מִנְחֹתֶךָ

וְעוֹלָתְךָ יְדַשְּׁנֶה סֶלָה.

יִתֶּן-לְךָ כִלְבָבֶךָ

וְכָל-עֲצָתְךָ יְמַלֵּא.

נְרַנְּנָה בִּישׁוּעָתֶךָ וּבְשֵׁם-אֱלֹהֵינוּ נִדְגֹּל

יְמַלֵּא ה' כָּל-מִשְׁאֲלוֹתֶיךָ.

עַתָּה יָדַעְתִּי כִּי הוֹשִׁיעַ ה' מְשִׁיחוֹ

יַעֲנֵהוּ מִשְּׁמֵי קָדְשׁוֹ

בִּגְבֻרוֹת יֵשַׁע יְמִינוֹ.

אֵלֶּה בָרֶכֶב וְאֵלֶּה בַסּוּסִים

וַאֲנַחְנוּ בְּשֵׁם ה' אֱלֹהֵינוּ נַזְכִּיר.

הֵמָּה כָּרְעוּ וְנָפָלוּ

וַאֲנַחְנוּ קַּמְנוּ וַנִּתְעוֹדָד.

ה' הוֹשִׁיעָה

הַמֶּלֶךְ יַעֲנֵנוּ בְיוֹם-קָרְאֵנוּ. "